Das bin ich
Herzlich Willkomme uf minere Websiite.
Ich bi d Claudia, Ehefrau, Mami vo zwei erwachsene Söhn und Familiemanagerin.
Bache isch sid Jahre eini vo miine grosse Liideschafte. Unvergässlich, die schöne Momänt, zäme mit mine Chind i de Wiehnachtsziit z Guetzle oder drü Königschueche z bache und dezue sälbergmachti Chrone z verziehre. Was gids schöners als strahlendi Chinderauge und mit Schoggi verschmierti Schläckmüüler, s isch als wärs geschter gsi.
Für mich isch gsund ässe und bache mit natürliche, früsche Zuetate sehr wichtig. Au Weizeunverträglichkeit isch es grosses Thema. Darum han ich i de Pandemie aagfange, mit sälber hergestellte Hefe, Suurteig und lange Gaarziite z bache. Ha au Kürs bsuecht.
Die gluschtig feine Bachware sind bi minere Famile, im Fründes und Bekanntechreis sehr guet aacho. Gli han ich Aafrage übercho, ob ich mini feine gluschtige Zöpf und au anderi Bacheware für Geburi, Wiehnachte und andere Events wie Brunch herstelle.
Alli freued sich und sind begeischtered, wenn es Mitbringsel en frische Zopf statt öppis zum abstaube isch.
So isch die Idee zu mim Bachshop entstande. I de Zwüscheziit sind us mine Chind erwaschseni Manne worde, wo mich jetzt i mim Herzprojekt grossartig motiviered und understützed.
Herzliche Dank mine Jungs
Ich freu mich uf euri Aafrage und Bschtellige!
Euri Claudia